時間 : 3月2日晚上
地點 : 中文大學逸夫書院宿舍
好朋友守口如瓶
我首先接觸幾個同孫耀威好 friend o既同學仔, 點知佢o地個個把口都鬼咁密實, 乜都唔肯講.
好友 : "我唔想講任何o野, 我要尊重番 Eric, 佢唔想我o地講o野... ..."
同房 : "我唔方便講o野, 要問 Eric 過先."
唉, 今次真係老貓燒鬚, 出師不利! 不過以上現象起碼證明 Eric o既人緣幾好, 班好朋友真係好錫佢, 好維護佢!
靠同學輕易過骨?
我 "拿拿臨" 轉移目標, 捉到個孫耀威o既同班同學, 點都要迫佢爆料!
"我上學期都見過Eric上一兩次堂, 今個學期 so far 未見過一. 不過佢上學期o既成績真係幾好, 有A-, B+... ..., 佢有3個好 friend o既同學, 專幫佢拿 notes 同埋話佢聽幾時要交功課, 其實讀呢科, 最緊要係交齊功課, 唔上堂都冇乜所謂."
舊日拍檔o既下落
有個出名諸事八卦o既宿生行過, 唔理三七廿一捉住佢問幾句先!
"我識孫耀威o既, 不過唔係好熟咋. 我唔覺得佢做o左歌星之後有咩唔同, 個人都幾好呀! 佢著衫一向都唔差, 冇話而家特別著得靚, 連髮型都冇改變過. 係今年至見佢有部吉普車, 通常都泊o係宿舍後面比較隱蔽o既地方. "
"佢間中會返o黎宿舍, 呢兩個星期見過佢兩三次左右. 其實大學生對於有人做o左歌星唔會有咩瘋狂反應, 我身邊o既人好好討論佢, 甚至有人唔識佢添!"
歌迷長駐宿舍?
宿舍管理員 : "孫耀威通常都係夜晚12點幾至返, 有時擺低o野逗留一陣間就走, 成日都有部Van仔或者私家車接載. 就算o係宿舍都會匿o係房, 好少周圍走, 佢邊有時間o者!"
"講起d歌迷都幾煩,幾乎日日都有妹妹仔o係宿舍外邊等孫耀威. 由四五個到十幾個都有, 有d一早整埋早餐o黎俾佢, 有d會等成十個鐘, 搞到夜晚八九點都唔走, 我o地咪搵保安趕佢o地走! 通常都等唔到, 就算等到都係簽名影相, 唔知為乜? 平時仲好多電話打o黎搵佢, 後來我o地索性唔幫佢o地駁線囉!"
"以前孫耀威好健康紮實, 而家成個人瘦晒, 個樣好虛浮咁."
贏過孫耀威?
孫耀威91年參加逸夫書院歌唱比賽, 只係得到獨唱組亞軍, 當年o既冠軍阿 Yan 對 Eric 有咩睇法呢?
"我記得佢唱 'Hello', 唱英文歌唱得似模似樣, 把聲幾靚外形又好. 當時我唱 '斷' 贏佢可能係因為聲線比較成熟同當晚臨場演出狀態好."
"個陣佢同個女仔夾歌, 成日條我隔離房練歌, 不停咁唱, 仲唱得好大聲, 我諗佢真係好熱愛唱歌!"
"我唔識佢o架, 不過印象中佢執得好正, 又鍾意打d '花喱碌' o既領呔, 成日同一班人玩埋一齊, 屬於又玩得又讀得o個種人."
Eric協助提供資料
雖然搜集到少情報, 但係搵唔到同孫耀威最 close o既人俾料, 始終有d唔甘心, 於是我決定 '騰' 返去佢房, 再試下 'tum' 佢同房講幾句o野. 點知一入房, 就見到目標人物孫耀威坐o係度... ...
尷尬o左幾秒鐘, Eric 劈頭第一句就話 : "你搵到 x x, 又搵過 x x呀? (Eric的好友) 佢o地個個都走o黎問我點算好. 好似話連贏過我o既冠軍都有搵喎, 其實有咩事問我咪得囉, 我唔想因為自己係歌星, 影響到d同學, 朋友或者屋企人."
嘩! Eric既要讀書又要唱歌, 居然咁快收到料, 好o野! 既然目標人物肯主動報料, 不妨聽下佢有咩講.
"全靠d朋友幫手拎 notes, 留意幾時考試同埋交功課o既deadline, 我基本上都交齊功課, 上學期o既成績仲好過前兩年, 平均成績有B以上. 第一, 二年又係田徑, 排球校隊, 又搞迎新營, 宿生會, 反而無乜時間讀書, 而家日頭做完唱片o的o野, 夜晚都可以做功課, 通常做到四五點."
"實有人用奇怪眼光望我, 有d人會專登行到我面前望下就行開, 但係無惡意o既. 有歌迷o係宿舍出邊等我, 有d仲會走上我間房, 匿埋o係洗衣房, 甚至跟我出去工程樓, 叫極佢o地都唔肯走, 我驚佢o地唔返學唔讀書."
"d講師唔會用有色眼鏡睇我, 佢o地都唔知我o係去邊做乜, 有個講師o係街度見到我張海報, 以為我幫音樂系做 project, 真係好笑!"
追蹤結果
孫耀威雖然要港台兩邊走, 忙住發展歌唱事業, 但係佢o既學業成績唔單止無退步, 仲好o左添, 因為佢有好友相助, 自己又聰明勤力, 仲好捱得喎!
Eric o係台灣好紅, 但係佢個人無乜點變, 都幾有人緣. 而其他中大學生對呢位偶像歌手投以奇怪眼光或者議論紛紛.
Eric 作為偶像歌手, 最大影響都係宿舍多o左d歌迷o係度等佢, 有好多歌迷信同埋無聊電話, 成日要勞煩佢既同房去擋駕!